O‘zbekiston Respublikasi Prezidentining 2026-yil 24-fevral kuni yoshlar bilan o‘tkazilgan muloqoti davomida vazirlik, idora va tashkilotlarda har payshanba kunini “Yoshlar kuni” sifatida tashkil etish, yoshlarning muammolarini o‘rganish hamda ularni hal etish bo‘yicha muhim vazifalar belgilab berilgan edi. Mazkur topshiriqlar ijrosini ta’minlash maqsadida joylarda turli mazmunli va qiziqarli tadbirlar tashkil etilmoqda.
Jumladan, 2026-yil 30-aprel kuni Asaka tumani 29-son bolalar musiqa va san’at maktabida Andijon viloyati Madaniyat boshqarmasi boshlig‘i Marxabo Sattarovaning yoshlar bilan ochiq muloqoti bo‘lib o‘tdi. Tadbirda yoshlar o‘zlarini qiziqtirgan savollar, taklif va muammolar yuzasidan bevosita suhbat qurish imkoniga ega bo‘ldilar.
Suhbat davomida maktabning fortepiano sinfi o‘qituvchisi hamda iqtidorli o‘quvchilari tomonidan ijro etilgan kuylar yig‘ilganlarga ko‘tarinki kayfiyat bag‘ishladi. Musiqiy chiqishlar tadbirga alohida ruh va mazmun baxsh etdi.
Tadbir doirasida yoshlar uchun “Fast-fudga muqobil” mavzusida oshpazlik master-klasslari ham tashkil etildi. Ushbu mashg‘ulotlarda ishtirokchilarga tez tayyorlanadigan, arzon va eng muhimi sog‘lom taomlar – foydali sendvichlar va smuzilar tayyorlash usullari amaliy tarzda o‘rgatildi. Bu esa yoshlar orasida sog‘lom ovqatlanish madaniyatini shakllantirishda muhim ahamiyat kasb etdi.
Shuningdek, rahbarlar boshchiligida milliy qadriyatlarimizni targ‘ib etishga qaratilgan harakatli o‘yinlar festivali ham o‘tkazildi. Unda arqon tortish, chillak, varrak uchirish kabi o‘yinlar orqali yoshlar jismoniy faollikka jalb qilindi. Ayniqsa, arqon tortish musobaqasi yoshlar o‘rtasida katta qiziqish uyg‘otdi va jamoaviylik ruhini mustahkamlashga xizmat qildi.
Mazkur tadbirga jami 40 nafar yoshlar qamrab olinib, ular uchun foydali, mazmunli va esda qolarli muhit yaratildi. Bunday tashabbuslar yoshlarning bo‘sh vaqtini mazmunli tashkil etish, ularni sog‘lom turmush tarziga yo‘naltirish hamda ijtimoiy faolligini oshirishda muhim ahamiyat kasb etadi.