2026-yil 17-aprel kuni Asaka tuman 29-son bolalar musiqa va san’at maktabida "Mahorat darsi" tashkil etildi. Ushbu tashrif Andijon shahar Sh. Jo‘rayev nomidagi ixtisoslashtirilgan san’at maktabining tasviriy san’at yo‘nalishi bo‘yicha faoliyat yurituvchi ustozlari ishtirokida bo‘lib o‘tdi.
Mazkur uchrashuvda qalam tasvir sinfi o‘qituvchisi Bunyodbek Saidov, rangshunoslik fani o‘qituvchisi Baybabayeva Shaxnoza hamda libos dizayni sinfi o‘qituvchilari Abdurashidova Zulfiya va Mashrabboyeva Gulsanamxonlar tashrif buyurdilar.
Uchrashuv davomida mahoratli ustozlar ishtirokida ilmiy, amaliy va nazariy yo‘nalishlarda mazmunli suhbatlar olib borildi. Suhbat jarayonida tasviriy san’atning dolzarb masalalari, ranglar uyg‘unligi, kompozitsiya yaratish, zamonaviy dizayn tendensiyalari hamda o‘quvchilarning ijodiy salohiyatini rivojlantirish yo‘llari haqida fikr almashildi.
Shuningdek, ustozlar tomonidan amaliy ko‘rsatmalar berilib, o‘quvchilar va o‘qituvchilar uchun foydali tavsiyalar taqdim etildi. Ushbu uchrashuv qatnashchilarga yangi bilim va tajriba ulashib, ijodiy izlanishlar uchun muhim turtki bo‘ldi.
Tadbir yakunida mehmon ustozlarga samimiy minnatdorlik bildirildi hamda bunday hamkorliklar kelgusida ham davom ettirilishi ta’kidlandi.